Kryeministri Edi Rama ka thënë në një intervistë për RTVE se influenca e Rusisë dhe Kinës nuk është gjëja më e përshtatshme për sigurinë dhe të ardhmen e Europës.
Rama tha se Shqipërinë nuk e shqetësojne këto influenca të mundshme, pasi Europa është bësimi dhe e ardhmja në BE është zgjedhja e lirë e vendit.
“Shiko, Ballkani Perëndimor është i rrethuar nga kufij evropianë, jemi një organ i trupit të Evropës dhe njëkohësisht jemi të izoluar nga po ky trup, diçka që nuk ka kuptim dhe nuk është gjëja më e përshtatshme as për sigurinë dhe as për të ardhmen e Evropës që kjo pjesë e trupit, të mos jetë totalisht e integruar po të jetë një zonë gri si të thuash, ku aktorë të tjerë mund të zhvillojnë lojën e tyre. Ne, Shqipërinë të paktën, nuk e shqetësojnë këto influenca të mundshme pasi për ne Europa është besimi ynë dhe e ardhmja në Bashkimin Europian është zgjedhja jonë e lirë”, ka thënë Rama.
Në intervistë është folur gjithashtu për mosnjohjen e pavarësisë së Kosovës nga Spanja dhe tensionet me Serbinë, e gjithashtu për të ardhmen e Shqipërisë në Bashkimin Europian. RTVE nuk ka lënë pa përmendur edhe faktin se Shqipëria do të strehojë përkohësisht rreth 4 mijë refugjatë afganë.
