Pas më shumë se gjashtë muajsh në arrati, autoritetet ekuadoriane kanë kapur Adolfo Macias Villamar, i njohur me nofkën “Fito”, kreu i bandës së dhunshme Los Choneros, që ka ndikuar thellësisht në shndërrimin e Ekuadorit nga një destinacion turistik në një nga vendet me kriminalitetin më të lartë në Amerikën Latine.
Operacioni i kapjes, i cili zgjati rreth 10 orë dhe u zhvillua në qytetin bregdetar Manta, u përfundua pa të shtëna armësh. Fito ishte fshehur në një bunker të ndërtuar nën një vilë luksoze trekatëshe, në një lagje elitare të qytetit.
Strehimi nëntokësor, i aksesueshëm përmes një dere të maskuar në dysheme, ishte i pajisur me krevat, frigorifer, ajër të kondicionuar dhe ambiente relaksi. Në katet sipër, vila kishte palestër dhe dhomë lojërash.
Fito, i cili nuk bëri rezistencë gjatë arrestimit, u transferua menjëherë në qytetin Guayaquil dhe më pas në burgun e sigurisë maksimale La Roca, nga ku ishte arratisur më 7 janar 2024 me ndihmën e rojeve të burgut.
Arratisja e tij shkaktoi një krizë të rëndë kombëtare, trazira në burgje, pengmarrje rojesh dhe shpallje të gjendjes së jashtëzakonshme nga Presidenti Daniel Noboa.
Autoritetet kanë konfirmuar se Fito pritet të ekstradohet në Shtetet e Bashkuara, ku përballet me akuza për trafik ndërkombëtar të kokainës. Gjatë qëndrimit në burg, ai kishte arritur të ngrihej në krye të Los Choneros dhe të vazhdonte aktivitetin kriminal nga pas hekurave.
Ai akuzohet gjithashtu si porositësi i vrasjes së kandidatit presidencial Fernando Villavicencio në gusht të vitit 2023, vetëm disa ditë para zgjedhjeve.
Nën drejtimin e Fito-s, Los Choneros krijuan lidhje të forta me kartelin Sinaloa të Meksikës, duke importuar në Ekuador një stil brutal dhune, përfshirë prerje koke dhe gjymtime, që më parë nuk ishin të zakonshme në këtë vend.
Kapja e Fito-s është një sukses i rëndësishëm për qeverinë e Noboa-s, i cili kishte premtuar gjatë fushatës së tij në 2023 se do të përballej pa kompromis me bandat që kishin marrë nën kontroll portet, burgjet dhe rrugët e Ekuadorit.
Megjithatë, sfida mbetet e madhe dhe ky është vetëm një hap në një luftë të gjatë kundër krimit të organizuar në rajon.
