Një ngjarje e rëndë ka ndodhur katër ditë më parë në qytetin e Elbasanit. Dyshohet se një shitës ambulant ka përdhunuar një 18-vjeçar me probleme mendore.
42-vjeçari, Altin Hida mendohet se i ka kërkuar ndihmë 18-vjeçarit, deri në banesën e tij. Ai e ka shoqëruar Hidën deri në banesën e tij, ku edhe mendohet se ka rënë pre e abuzimit seksual.
Sipas “Report Tv”, Altin Hida është i martuar dhe ka dy fëmijë. Ai punon si shitës ambulant, 20 metra larg Komisariatit të Policisë në Elbasan.
Policia është vënë në dijeni të kësaj ngjarjeje një ditë pasi ka ndodhur ngjarja dhe pasi kanë marrë dëshminë e Hidës, e kanë lënë të lirë.
Sipas familjarëve të 18-vjeçarit, në banesën e tyre ka shkuar edhe bashkëshortja e Hidës, ku mendohet se u ka kërkuar familjarëve të djalit që kjo histori të mbyllej. Ajo kishte thënë se burri i saj mund të vriste veten nga gjendja e rënduar psikologjike në të cilën ndodhej pasi kishte dhënë dëshminë në polici.
Denoncimi në policinë e Elbasanit është bërë nga familja, por ekspertiza ka rrëzuar pretendimet e tyre. Familjarët e 18-vjeçarit nuk e kanë lënë me kaq, por e kanë dërguar në Tiranë, duke kundërshtuar raportin e parë ligjor.
Për arsye hetimore policia nuk ka dhënë të tjera detaje lidhur me ngjarjen e rëndë. Prokuroria do të kryejë të gjitha veprimet ligjore të nevojshme për zbardhjen e ngjarjes së rëndë që pretendohet nga familjarët e 18-vjeçarit nga Elbasani.
