Forca të shumta policia kanë rrethuar mëngjesin e sotëm Teatrin Kombëtar. Kjo ngjarje u paralajmërua që ditën e djeshme nga qytetarët protestues që kanë dalë kundër vendimit për prishjen e tij.
Sot do të nisë edhe shembja e godinës dhe do të largohen edhe materialet të cilat ndodhen brenda Teatrit Komëtar.
Lidhur me ngjarjen ka reaguar edhe presidenti Ilir Meta, i cili i ka bërë thirrje policisë që të respektojë artistët. Meta e ka cilësuar një ngjarje të shëmtuar dhe të turpshme këtë që po ndodh, pasi artistët e qytetarët janë në mbrojtje të vlerave të trashëgimisë sonë historike, kulturore e kombëtare.
Madje, Presidenti e ka cilësuar si një vendim abuziv e korruptim prishjen e Teatrit Kombëtar. Në postimin e tij në Facebook, Meta ka përsëritur tre herë shprehjen “shumë turp”!
Rrethimi me policë i Teatrit Kombëtar dhe përplasjet fizike me komunitetin e artistëve, të cilët janë aty në mbrojtjen e një prej vlerave të trashëgimisë tonë historike, kulturore e kombëtare, janë një ngjarje e shëmtuar dhe e turpshme.
I bëj thirrje Policisë së Shtetit të respektojë artistët dhe të mos i dhunojë ata fizikisht në ushtrimin e së drejtës së tyre për të protestuar ndaj një vendimi abuziv e korruptiv për prishjen e godinës së Teatrit, dhe as t’i lëndojë ata shpirtërisht, në respekt të dinjitetit njerëzor dhe kontributeve të vyera që kanë dhënë për artin e kulturën kombëtare.
As sampistët e Ramiz Alisë nuk e kanë prekur me dorë Edmond Budinën në dhjetor ’90!
Shumë turp! Shumë turp! Shumë turp!”, shkruan Meta në rrjetin social Facebook.
