Presidenti në ikje i Këshillit Europian, Donald Tusk, do të vizitojë këtë të martë Shqipërinë.
Ai pritet të takohet me krerët më të lartë të shtetit, ku në fokus të bisedimeve do të jetë çelja e negociatave për anëtarësim në BE.
Gjatë ditës së sotme Tusk do të ndalojë në Maqedoninë e Veriut, ndërsa nesër pritet të mbërrijë në Shqipëri.
Pjesë e axhendës së tij do të jetë edhe zgjidhja e krizës politike, që ka mbërthyer vendin prej 7 muajsh, shkruan “Panorama”.
Ndërkohë në një intervistë për të përditshmen malazeze, “Vijesi”, Komisionieri për Zgjerimin dhe Fqinjësinë e Mirë në largim, Johannes Hahn, tha se Shqipëria dhe Maqedonia meritojnë hapjen e negociatave.
Sipas Hahn, BE-ja duhet ta shpërblejë Shqipërinë për përparimin me Reformën në Drejtësi.
Ndërsa për Maqedoninë e Veriut, Komisioneri ka vlerësuar marrëveshjen e emrit me Greqinë, që i dha fund mosmarrëveshjeve prej disa dekadash.
