Në një akt të paprecedentë që shkel rëndë lirinë digjitale dhe të drejtën për informim, qeveria shqiptare ka marrë vendimin për të mbyllur aksesin në platformën Tik-Tok. Ky vendim jo vetëm që cenon drejtpërdrejt lirinë e fjalës, por e vendos Shqipërinë në një listë të errët shtetesh që preferojnë censurën dhe izolimin digjital, krah për krah me regjime autoritare si Koreja e Veriut apo Afganistani.
Vendimi i qeverisë vjen pikërisht në prag të zgjedhjeve të 11 Majit 2025, si një masë drastike për çdo qytetar të lirë. Kufizimi i aksesit në një platformë kaq të përdorur, sidomos nga të rinjtë, nuk është thjesht censurë ndaj një aplikacioni, por një sulm i drejtpërdrejtë ndaj demokracisë, lirisë së fjalës dhe të drejtës së qytetarëve për informim të lirë e pluralist.
Pasojat e këtij vendimi nuk do të jenë vetëm politike, por edhe ekonomike. Turizmi, kryefjala e viteve të fundit në Shqipëri që pati një boom të madh prej platformës Tik-Tok, tashmë pritet të marrë një goditje të rëndë.
Platforma Tik-Tok ka qenë një mjet jetik marketingu dhe promovimi për mijëra biznese lokale, sidomos në fushën e hotelerisë, gastronomisë dhe akomodimeve turistike. Shumë sipërmarrës e krijues të përmbajtjes tashmë rrezikojnë të humbasin jo vetëm të ardhurat por edhe vetë mbijetesën e tyre.
Në një kohë kur turizmi është një prej shtyllave kryesore të ekonomisë shqiptare, një vendim i tillë arbitrar do të çojë drejt falimentimit shumë biznese, duke nxitur papunësinë dhe krizën ekonomike. Ndërkohë, censura nuk i dëmton vetëm bizneset, por edhe mirëqenien mendore dhe edukimin informal të të rinjve, të cilët kanë gjetur në Tik–Tok një hapësirë për kreativitet dhe shkëmbim idesh.
Vendimi për mbylljen e Tik-Tok duhet parë si alarm për të ardhmen e lirisë digjitale në Shqipëri. Nëse sot është Tik-Tok, nesër mund të jetë çdo platformë tjetër që sfidon narrativën qeveritare. Shqipëria duhet të zgjedhë rrugën e demokracisë dhe transparencës, jo censurës dhe izolimit!
Është koha për reagim të fortë qytetar dhe ndërkombëtar për të ndalur këtë përshkallëzim të rrezikshëm të censurës. Liria e fjalës dhe e drejta për informim nuk janë luks, por kushte bazë të një shoqërie të lirë dhe demokratike!
Firmos peticionin tonë në linkun në bio (kliko edhe këtu), për të ndaluar kategorikisht cënimin që qeveria shqiptare po i bën qytetarëve të saj!
