Ministri i Brendshëm, Taulant Balla, deklaroi në parlament se Shqipëria po punon për të krijuar një regjistër të unifikuar adresash në rang vendi. Ai theksoi se Shqipëria do të jetë vendi i parë në Ballkan që do të ketë një rrjet të tillë adresash.
“Çdo ndërtesë do të ketë një kod unik, kjo lehtëson saktësinë e informacionit për adresat,” tha Balla. “Duhet të kemi regjistër unik adresash në rang vendi. Të gjitha institucionet do të referohen në këtë regjistër, nuk ka më që Kadastra të ketë adresat e veta, bashkia të vetat.”
Ai shtoi se regjistri i ri do të ndihmojë qytetarët të gjejnë lehtësisht adresat përmes një kodi 18-shifror. “Shikoni faqen ‘Adresari’, ku po punohet për regjistrim adresash. Mjaft më me atë historinë ‘Jam te Pallati me Shigjeta, pak lart’. Çdo banesë do të ketë kod 18-shifror.”
Balla tha se ky sistem do të ndihmojë edhe turistët që vizitojnë Shqipërinë. “Shqipëria po bëhet vend i preferuar turistik dhe me këtë sistem, turistët gjejnë më lehtë shtëpinë që kanë prenotuar,” tha ai.
Ai përfundoi duke kërkuar mbështetjen e deputetëve për projektligjin: “Votojeni projektligjin, sepse populli do t’ua dijë për faleminderit.”
