Shantazhet në rrjetet sociale janë kthyer në një problem shqetësues, veçanërisht për adoleshentët, të cilët shpesh bëhen viktima të kërcënimeve me publikimin e fotove intime ose të dhënave personale.
Një rast i tillë u trajtua së fundmi nga emisioni “Fiks Fare”, ku një 17-vjeçar nga Lushnja rrëfeu se po shantazhohej nga një 21-vjeçar nga Shkodra, të cilin e kishte njohur përmes një loje online.
Shantazhuesi i kërkonte të miturit të krijonte profile të rreme, duke u prezantuar si femër, për të marrë numra telefoni dhe më pas për të vjedhur para nga viktimat.
“Unë jam nxënës i shkëlqyer në shkollë , por kam rënë pak nga mësimet që kur më ka dalë ky problem, sepse kam ankth” tregon i mituri
Kërcënimet përfshinin edhe pretendime të rreme për abuzime brenda familjes së tij, duke e bërë atë të ndjehej i frikësuar për sigurinë e familjes.
“Fiks Fare” verifikuan komunikimet mes të miturit dhe shantazhuesit, ku ky i fundit pranonte se kishte publikuar foto të tij dhe nuk kishte ndërmend t’i fshinte ato.
Në një takim të organizuar në Velipojë, shantazhuesi pranoi se kishte fituar 8 mijë euro në 4 muaj përmes vjedhjes së llogarive dhe shantazheve, duke përfshirë edhe raste ku kishte marrë para nga ish-e dashura e tij në këmbim të mos publikimit të fotove nudo.
