Banorët e Hotolishtit në Librazhd kanë zhvilluar sot një tjetër protestë, duke shprehur pakënaqësinë e tyre për mungesën e reagimit nga Ministria e Infrastrukturës dhe konkretisht nga ministrja Belinda Balluku.
Në qendër të shqetësimit të tyre janë kërkesat për shpronësime me vlerën reale të tregut dhe ndërtimin e një tuneli, si alternativë për zbatimin e projektit të Korridorit VIII. Sipas banorëve, kjo zgjidhje do të evitonte dëmtimin e zonës historike të fshatit dhe të mjedisit përreth, duke ruajtur integritetin e komunitetit dhe trashëgiminë kulturore.
Ata akuzojnë ministren Balluku për shpërfillje të vazhdueshme, duke theksuar se ajo ka refuzuar të takohet dhe të bisedojë drejtpërdrejt me ta për shqetësimet e ngritura.
Protesta e sotme vjen pas disa thirrjeve të përsëritura nga banorët, të cilat, sipas tyre, janë injoruar plotësisht nga autoritetet.
