Protesta e opozitës ka pasur mbështetësit dhe kundërshtarët e saj, të cilët duhet thënë se ishin ata që priteshin të ishin. Megjithatë i ftuar në “Kjo Javë”, kreu i Grupit Parlamentar të Partisë Socialiste, Taulant Balla, i ka kushtuar një vëmendje të veçantë dy liderëve të opozitës, të cilëve iu ka dërguar edhe një mesazh. Balla ka thënë me ton bindës Lulzim Bashës dhe Monika Kryemadhit se duhet ta heqin nga mendja se mund të ndryshojnë datën e zgjedhjeve sepse kjo nuk ka për të ndodhur.
“Doni apo nuk doni zgjedhjet lokale do mbahen më 30 qershor. Harrojeni se mandatin që na kanë besuar shqiptarët mund të tentoni ta bëni pis. Gjithë shqiptarët e dinë kush blen vota, i ka Luzim Basha me vete”.
Mirëpo nuk kishte si të mungonte dhe ironizimi i kreut të PD për përfundimin e protestës. Ashtu si edhe shumë qytetarë, mesa duket dhe Balla ka pritur që protesta të zgjasë më shumë se aq, pasi gjatë fjalës së tij ai thotë se nuk kishte asnjë dyshim që protesta do të mbyllej.
“Nuk kisha asnjë dyshim fare se do të mbyllej protesta, pasi kur i vjen Lulit ora e supës ndërpret çdo gjë… Leja që ishte dhënë ishte deri në orën 16:00 dhe protesta u mbyll në 15:55”,- tha Balla.
Gjatë protestës së sotme, Taulant Balla tha se u dëmtua prona publike dhe për këtë Prokuroria e Tiranës duhet t’i ketë nisur tashmë hetimet.
“Prokuroria e Tiranës duhet të ketë filluar hetimet pasi ka pasur dëmtim të pronës publike, që solli reagimet e gjithë ndërkombëtarëve. Ajo që kam thënë është shumë e qartë, masat ndëshkimore penale i përcakton Kodi Penal”,- tha ai.
