Policia arrestoi ditën e sotme, Redjan Rrajën, një nga personat e dyshuar për atentatin ndaj prokurorit Arjan Ndoja në Durrës, 4 ditë më parë.
Ai u ndalua në momentin kur po tentonte të arratisej jashtë vendit.
Rraja u zbulua nga gjurmët e ADN-së, pasi iu bë ekspertiza objekteve të gjetura në makinën e braktisur nga autorët.
Në lidhje me këtë ngjarje ka reaguar edhe kryeministri Edi Rama.
Shefi i qeverisë ka përgëzuar policinë e shtetit.
Më tej Rama ka kujtuar se shumë shpejt, do të hyjë në fuqi ligji special ’41 bis’, për të dënuarit për krime të rënda.
Kryeministri u ndal edhe te lufta kundër asaj që ai e quan KÇK (Kap ça të kapësh).
Me këtë nofkë Rama ka pagëzuar të korruptuarit në sistemin e drejtësisë.
Shefi i qeverisë shtoi se do t’i nxjerrë ujin e zi foleve të krimit të organizuar, si dhe do të vijojë luftën me prokurorët e gjykatësit e korruptuar.
Përshëndes me respekt punën e shkëlqyer të Policisë së Shtetit për zbardhjen e ngjarjes kriminale, ku u implikua edhe prokurori i Durrësit👍Brenda muajit Ligji Special kundër personave të dënuar, akuzuar a hetuar brenda/jashtë vendit për krim të organizuar apo krime të rënda…
dhe masat speciale kundër KÇK-së👊 Do t’i nxjerrim “ujë të zi” foleve të krimit të organizuar dhe do të reagojmë frontalisht ndaj gjykatësve e prokurorëve të inkriminuar, që duan “të kapin ç’të kapin”, deri ditën kur kanë radhën e spastrimit nga Vetingu #DerinëFund #ZeroTolerancë
— Edi Rama (@ediramaal) November 5, 2019
