Ekspertët kanë ngritur shqetësimin se niveli global i akullit ka arritur shifrat më të ulëta të regjistruara ndonjëherë në muajin shkurt.
Sipas Shërbimit të Ndryshimeve Klimatike të BE-së, Copernicus (C3S), zona e kombinuar e akullit rreth poleve verior dhe jugor arriti një minimum të ri ditor në fillim të muajit shkurt dhe mbeti nën rekordet e mëparshme për pjesën tjetër të muajit.
Samantha Burgess, zëvendësdrejtoresha e C3S, tha:
“Një nga pasojat e ngrohjes globale është shkrirja e akullit, dhe niveli i ulët i akullit në det ka çuar në mbulimin global më të ulët të akullit të detit në histori.”
Sipas të dhënave, zona e akullit në Arktik arriti nivelin më të ulët të regjistruar për shkurt, 8% nën mesataren, ndërsa në Antarktik ishte 26% nën mesataren.
Vëzhgimet satelitore shtrihen që nga fundi i viteve 1970 dhe të dhënat historike mbërrijnë në mes të shekullit të 20-të.
Gjithashtu, shkencëtarët vërejtën një anomalie të jashtëzakonshme të temperaturave të larta në Polin Verior në fillim të shkurtit, që çoi në rritje të temperaturave mbi 20 gradë Celsius më shumë se mesatarja, duke kaluar pragun e shkrirjes së akullit.
Ky rekord i ri u përshkrua si “shumë shqetësues”, pasi akulli reflekton rrezet e diellit dhe ndihmon në ftohjen e planetit.
C3S gjithashtu njoftoi se shkurti i vitit 2025 ishte shkurti i tretë më i nxehtë që është regjistruar ndonjëherë, me temperatura 1.59°C më të larta se nivelet paraindustriale. Ky muaj shënoi 19 nga 20 muajt e fundit që kanë pasur temperatura më shumë se 1.5°C mbi nivelet paraindustriale.
