Detaje të reja kanë dalë në dritë mbi aksidentin tragjik që ndodhi mbrëmjen e kaluar në Fushë-Prezë, ku humbën jetën katër të rinj. Mësohet se viktimat kishin shkuar në aeroportin e Rinasit për të pritur Enejd Laçin, i cili sapo ishte kthyer nga Gjermania.
Pak minuta pasi u larguan nga aeroporti, makina e tyre u përplas fatalisht me një betoniere, duke u shkrumbuar plotësisht në flakë.
Katër viktimat u dogjën brenda në makinë, duke humbur jetën.
Sipas informacioneve të deritanishme, automjeti ku udhëtonin të rinjtë u përplas me një betoniere në aksin rrugor Fushë Krujë-Vorë, pranë zonës së Fushë-Prezës. Mjeti u përfshi menjëherë nga flakët, duke mos u dhënë asnjë mundësi shpëtimi pasagjerëve.
Viktimat e aksidentit tragjik janë:
• Enejd Laçi, 25 vjeç (drejtuesi i makinës)
• Erild Laçi, 20 vjeç (vellai i tij)
• Andi Laçi, 22 vjeç
• Enrikejd Kurti, 24 vjeç
Nga të dhënat paraprake, automjeti i viktimave ishte i pajisur me motor benzinë-gaz, çka mund të ketë ndikuar në shpërthimin e menjëhershëm të flakëve pas përplasjes. Trupat e të rinjve u gjetën të karbonizuar brenda mjetit, ndërsa u transportuan më pas në morgun e Tiranës.
Drejtuesi i betonieres, Aleksandër Krrashi, 24 vjeç, fillimisht nuk u gjet në vendngjarje pas aksidentit, por më vonë u ndalua dhe u shoqërua në polici për të dhënë dëshminë e tij. Autoritetet po hetojnë për të zbardhur të gjitha rrethanat e aksidentit dhe për të përcaktuar nëse betonierja u fut në rrugën kryesore në mënyrë të parregullt apo nëse shpejtësia e makinës së viktimave ka ndikuar në përplasjen fatale.
Policia dhe grupi hetimor po punojnë për të përcaktuar shkakun e saktë të aksidentit, ndërsa ekspertiza teknike pritet të ndihmojë në rindërtimin e dinamikës së përplasjes. Dyshimet e para flasin për mundësinë që betonierja u fut papritur në rrugën e makinës së viktimave, duke shkaktuar aksidentin.
