Deri tani në rang botëror janë shënuar 17,507 viktima dhe 402,159 të infektuar në 196 shtete, ndërsa në vendin tonë janë 123 të infektuar dhe 5 viktima.
Mes dilemave të shumta që i mundojnë njerëzit në këtë periudhë është fakti nëse një pacient i shëruar mund të preket sërish nga COVID-19.
Së fundmi, mjeku Arjet Gega ka qetësuar të gjithë njerëzit pasi është shprehur se të gjithë personat që shërohen ka shumë mundësi që të bëhen imun nga ky virus për të paktën 6 muaj ose një vit.
Në një lidhje me Skype nga SHBA-ja, për Ora News, mjeku Gega tha se vdekshmëria është deri në 1.5%, teksa shtoi se 98.5% e të prekurve do shërohen me patjetër.
“Mund të themi që të paktën për 6 muaj deri në një vit parashikohet, sepse nuk kemi asnjë pacient që ka qenë i sëmurë për 6 muaj. Pacienti i parë në Kinë mendohet të ketë qenë në 17 ose 19 nëntori. Por e bazuar në parashikime duket që nga 6 muaj deri në një vit ekzistojnë antikorpet e mjaftueshme për imunitet, mund të jete edhe imunitet për jetë, këtë nuk e dimë. Por të paktën 6 muaj deri në një vit nuk ka rrezik për infektim. Kështu mendohet. Sa i përket festës që duhet të bëjmë për njerëzit, sepse shikojmë edhe në Shqipëri që janë 5-6 pacientë të shëruar dhe dalin në media, politikanë të ekzekutivit dalin dhe e festojnë…patjetër që ky është një virus që mortalitetin do e ketë 1.3-1.5% në një vend ku shëndetësia funksionon normalisht. Kështu që 98.5% e njerëzve patjetër që do të shërohen. Kështu shpresojmë të vazhdojë, pra ata njerëz që nuk kanë komplikacione serioze, patjetër që do jetojnë dhe do ketë imunitet dhe do dalin nga spitali. Shpresojmë që këto numra të rriten. Pra nëse kemi 100-200 të konfirmuar deri tani në Shqipëri mendojmë që shumica e tyre do shkojnë në shtëpi të shëruar,”– tha Gega më tej.
Kujtojmë se COVID-19 ka prekur edhe shumë mjekë, teksa numri i mjekëve dhe infermierëve të infektuar në vendin tonë ka shkuar në 10.
Mbrëmjen e sotme u raportua se një mjeke nga Infektivi mund të jetë infektuar pasi ka shfaqur simptoma, teksa mësohet se ajo ka qenë në kontakt të vazhdueshëm me të prekurit.
BE ditën e sotme i ofroi vendit tonë 50 milionë euro në kuadër të ndihmës për të luftuar Coronavirusin: 4 mln€ për pajisje dhe mbështetje shëndetësore, 11 mln€ për mbrojtjen sociale dhe deri në 35 mln€ për rimëkëmbjen ekonomike.
