Policia e Kosovës ka arrestuar shtatë persona të dyshuar për përfshirje në planifikimin dhe ekzekutimin e vrasjes së rreshterit Muhamed Lika, gjatë një operacioni të gjerë të zhvilluar mëngjesin e së hënës.
Lika u vra më 1 prill, në mbrëmje, në hyrje të ndërtesës ku banonte, teksa po kthehej në shtëpi pas përfundimit të turnit të punës.
Gjatë një konference për media, drejtori i Policisë së Kosovës, Gazmend Hoxha, dhe kryeprokurori i Prokurorisë Themelore të Ferizajt, Burim Çekini, deklaruan se motivi i vrasjes mund të lidhet me detyrën e viktimës si zyrtar policor.
Autoritetet konfirmuan gjithashtu se në mesin e të ndaluarve është edhe një ish-anëtar i Forcës së Sigurisë së Kosovës, por nuk bënë të ditur identitetin e tij.
