Qeveria ka miratuar shpërblimin e fundvitit për familjet në nevojë, fëmijët jetimë dhe personat me aftësi të kufizuara, duke akorduar një shumë prej 150 eurosh për secilin përfitues.
Ministrja e Shëndetësisë dhe Mbrojtjes Sociale, Albana Koçiu, njoftoi se ky vendim përfshin 275 mijë familje dhe individë që përfitojnë nga skemat e mbrojtjes sociale.
“Sot, qeveria ka miratuar një fond prej 2.1 miliardë lekësh për të mbështetur këto kategori në prag të festave të fundvitit. Për herë të parë, përfitojnë edhe 18 mijë ndihmës dhe kujdestarë të personave me aftësi të kufizuara,” tha ministrja Koçiu, duke e quajtur këtë një vendim solidariteti për shoqërinë shqiptare.
Përfituesit përfshijnë familjet në nevojë, fëmijët pa kujdes prindëror, personat para dhe tetraplegjikë, si edhe ata me statusin e të verbrit. Ky shpërblim synon të mbështesë shtresat më në nevojë në shoqëri gjatë festave.
