Në projektbuxhetin e vitit 2021 qeveria nuk ka ndarë asnjë lek për organizimin e zgjedhjeve, ndërsa ka mbajtur për këtë qëllim 1 miliard lekë rezervë tek paratë e kontigjencës.
“Niveli i fondit rezervë për vitin 2021 parashikohet në masën 4 miliardë lekë. Përkatësisht, 2 miliardë lekë fondi rezervë i Këshillit të Ministrave, 1 miliard lekë fond kontigjencë për mbështetjen e procesit zgjedhor dhe 1 miliard lekë fond rezervë për studime dhe projektime, për projektet e investimeve publike strategjike që do të zhvillohen përgjatë vitit 2021”, deklaroi ministrja e Financave Denaj, në një raportim me dyer të mbyllura në Byronë e Kuvendit.
Kuptohet se 1 miliard lekë të rezervës për investimet publike do të përdoret nga kryeministri për të mbyllur projekte me anë të Fondit të Shqiptar të Zhvillimit. Ky fond i shërben qeverisë për të shmangur ndarjen e këtyre parave tek bashkitë, duke i përdorur në projekte që shpesh kanë efekt elektoral.
Ndërkaq, për shpenzimet vjetore, Komisionit Qendror të Zgjedhjeve i janë ndarë 137,5 milionë lekë, po aq sa ka shpenzuar edhe gjatë këtij viti. Janë rreth 2 milionë lekë më pak se u shpenzuan në vitin 2017, që ishte vit elektoral.
Duke pasur parasysh se zhvillimi i zgjedhjeve në vetvete kërkon një fond të caktuar të veçantë, qeveria na lë të mendojmë se 1 miliard lekë të rezervës do të përdoren për këtë qëllim.
Që nga momenti që del dekreti i presidentit për datën e zgjedhjeve, përcaktohen të gjitha shpenzimet, që nga pagat në të gjitha nivelet e komisioneve, KZAZ, Komisionet e Qendrave të Votimit, të grupeve të numërimit, dokumentet që duhen shtypur. Janë rreth 40-45 mijë persona të cilët marrin pjesë në proces. Llogariten shpenzimet për fletët e votimit, kutitë, kodet e sigurisë, bojën matrikulluese, ambientet me qira për qendra votimit apo qendrat e numërimit pasi shumica janë ambiente private. Kurse zgjedhjet e 25 qershorit kanë kushtuar rreth 6 milionë dollarë.
Ndërkohë mbetet i pa përcaktuar fondi me të cilin do të zhvillohej tenderi për teknologjinë e identifikimit biometrik të zgjedhësve. Qeveria në qershor arriti një marrëveshje me opozitën për ta vendosur këtë teknologji në zgjedhjet e vitit 2021.
Sipas kësaj marrëveshje, “Palët angazhohen të mbështesin implementimin e identifikimit elektronik duke përfshirë 100% të votuesve në zgjedhjet e ardhshme, për aq sa është teknikisht e zbatueshme. Zbatueshmëria do të përcaktohet nga KQZ e mbështetur nga ekspertizë ndërkombëtare. Qeveria do të garantojë fondet në kohë për implementimin, për aq sa është teknikisht e zbatueshme”.
Projektbuxheti nuk ka asnjë rresht për këtë qëllim, asnjë lek për teknologjinë në zgjedhje. Gjithsesi Projektbuxheti është kujdesur të përcaktojë paratë për partitë politike, që janë 140 milionë lekë.
/GazetaReforma.com/
