Kreu i SPAK-ut, Altin Dumani, e ka cilësuar të suksesshëm bashkëpunimin me ndërkombëtarët, gjatë fjalës së tij në Parlament.
Ai theksoi se gjatë periudhës 2020-2023 janë krijuar 32 skuadra të përbashkëta hetimore dhe se SPAK ka nënshkruar marrëveshje bashkëpunimi dypalëshe me shumicën e vendeve të BE-së për çështje konkrete.
Dumani nënvizoi investimet në mjete dhe teknologji bashkëkohore, të cilat kanë kontribuar në sukseset e hetimeve, sidomos në çështjet e korrupsionit dhe krimit të organizuar.
Ai theksoi gjithashtu forcimin e bashkëpunimit me vendet homologe në vitin 2024, duke përmendur marrëdhëniet e shkëlqyera me Malin e Zi.
SPAK ka hetuar dhe ndjekur penalisht zyrtarë të lartë, përfshirë anëtarë të kabinetit qeveritar, deputetë, gjyqtarë, prokurorë dhe funksionarë të policisë.
Dumani po ashtu theksoi se SPAK ka ushtruar ndjekje penale për kryetarë dhe ish-kryetarë bashkish, dhe ka goditur grupe kriminale të përfshira në tregjet ndërkombëtare të drogës.
Në 5 vite, SPAK ka sekuestruar asete me vlerë 150 milionë euro dhe ka rritur hetimet proaktive, duke regjistruar procedime penale me iniciativë të vetë institucionit, për të ndëshkuar ata që shkelin ligjin.
