Apeli i GJKKO ka vendosur të lërë në burg 10 anëtarët e grupit kriminal të akuzuar për trafikun e kokainës të fshehur në lëkurat e bagëtive.
Gjykata nuk pranoi kërkesat për lehtësimin e masave të sigurisë për të akuzuarit, të arrestuar gjatë një operacioni të madh policor më 15 nëntor.
Gjatë aksionit u arrestuan edhe tre shtetas nga Amerika Latine: dy venezuelianë dhe një kolumbian.
Këta dyshohet se do të përpunonin kokainën për ta ndarë nga lëkurat e kriposura të gjedhit në laboratorin e grupit, i cili ndodhej në Qerekë të Fushë-Krujës.
Kokaina e sekuestruar po i nënshtrohet analizave për të përcaktuar sasinë e saktë që mund të nxirrej nga ngarkesa prej 48 tonësh lëkurë gjedhi.
Hetuesit e SPAK kishin vëzhguar për muaj me radhë dy ngarkesa, një në shtator dhe një në nëntor, para se të ndërhynin me arrestimet dhe kontrollet.
Kontrolle të tjera u kryen në disa vila në zonën “Kodra e Diellit 2” në Tiranë dhe në disa lokacione në Durrës, që dyshohet se shërbenin si baza dytësore të grupit kriminal.
Droga transportohej nga Amerika Latine e fshehur në lëkurat e kriposura të bagëtive, përmes portit të Durrësit dhe aeroportit. Ajo përpunohej më pas në laboratorin në Qerekë, ku ekspertët nga Kolumbia dhe Venezuela bënin ndarjen e kokainës.
Të arrestuarit
Shtetas shqiptarë:
1. Geis Fejsullai, 42 vjeç, banues në Tiranë
2. Klajd Birçe, 40 vjeç, banues në Tiranë
3. Aldi Zonja, 37 vjeç, banues në Tiranë
4. Artion Çaushllari, 37 vjeç, banues në Tiranë
5. Endi Sejdini, 25 vjeç, banues në Krujë
6. Ismail Abdurrahmani, 51 vjeç, banues në Shkodër
7. Baki Huqi, 57 vjeç, banues në Durrës
Shtetas të huaj:
8. Hiëlen Ledezma Narvaez, 41 vjeç, shtetas kolumbian
9. Joze Ramon Zacarias Vasquez, 35 vjeç, shtetas venezuelian
10. Samuel Alfonso Moreno Serrano, 42 vjeç, shtetas venezuelian
SPAK vazhdon hetimet për të zbardhur të gjitha hallkat e rrjetit kriminal dhe për të identifikuar bashkëpunëtorët e mundshëm në vend dhe jashtë tij.
