Një krim i rëndë u regjistrua mbrëmjen e djeshme në Rrëshen, ku mbetën të vrarë motër e vëlla, Esmeralda dhe Vledison Filopati.
Autori i dyshuar i krimit është Fatmir Kolecaj, i cili është në kërkim nga policia.
Kolecaj ishte arrestuar në vitin 2017 për shkak të dhunës që ushtronte ndaj Esmeraldës, me të cilën kishte 3 fëmijë.
Ai u shpall fajtor për “Dhunë në familje” dhe “Armëmbajtje pa leje”.
Esmeralda Filopati në dëshminë e saj para gjykatës, ka treguar dhunën e tmerrshme të ushtruar nga bashkëshorti.
Ajo shprehej se burri e kërcënonte duke i thënë: “Do të vras po njoftove policinë”.
Rasti më i fundit i regjistruar është i datës 12.07.2017, ku Fatmiri sapo ka hyrë në banesë ka filluar të godasë me shuplaka bashkëshorten.
Më pas ka marrë një tub gome dhe ka filluar ta godasë në pjesë të ndryshme të trupit për rreth një orë.
E dëmtuara ka telefonuar babain e saj, i cili më pas ka bërë denoncimin në polici.
Autori i dyshuar gjithashtu mbante një armë në shtëpi dhe i ka thënë Esmeraldës: “Të parën do të vras ty, pastaj do merrem me ato”.
Gjatë këqyrjes së trupit të gruas, u konstatuan dëmtime dhe hematoma të shumta, të shkaktuara nga tubi i gomës.
Dhuna i shkaktoi Esmeraldës humbjen e aftësisë për punë për 9 ditë.
