Kryeministri Edi Rama ka paralajmëruar masa të tjera shtrënguese në luftën ndaj koronavirusit.
Me një komunikim online nga shtëpia e tij në Surrel, shefi i qeverisë tha se do të ndalohen frekentimet në zonën e liqenit dhe në të gjitha zonat rekreative brenda perimetrit të blinduar.
Sipas tij, nuk ka më kohë për të sensibilizuar qytetarët.
“Jemi me fat që kemi këtë kohë të mirë dhe të ngrohtë, mund t’i mbajmë dritaret hapur gjatë gjithë ditës për ajrosjen e shtëpisë dhe të fikim ajrin e kondicionuar që është një armik në këtë luftë. Por kjo nuk do të thotë të dalim xhiro familjarisht siç ka ndodhur dje dhe sot në Liqenin e Tiranës ku vërtetë nuk kishim shumë njerëz si zakonisht në një mot të tillë, por mjaftueshëm për të cënuar rregullat e mbrojtjes individuale. Apo buzë liqenit të Shkodrës ku mbrëmë ishte sikur jemi në një kohë pushimesh dhe jo në kohë lufte. Nuk kemi kohë për të vazhduar me sensibilizimet sepse çdo orë është kritike për forcimin e vijave të mbrojtjes individuale dhe kolektive. Prandaj do të ndalojmë menjëherë frekuentimet në zonën e parkut të liqenit në Tiranë dhe në të gjitha zonat rekreative në cdo qytet brenda perimetrit të ri të blinduar”, tha Rama në një video mesazh për qytetarët nga shtëpia e tij në Surrel.
Më tej shefi i qeverisë, tha se javën e ardhshme do të kemi më shumë të infektuar, ndërsa beson se rritja e temperaturave do të dobësojë forcën goditëse të virusit.
Ndër të tjera kryeministri ka zbuluar, se njëri prej të shtruarve në repartin e Infektivit mbahet me frymëmarrje të drejtuar nga aparatura.
Në vendin tonë janë regjistruar 38 të infektuar dhe 1 viktimë nga koronavirusi.
ISHP bëri me dije se 12 prej të infektuarve ndodhet te Infektivi, nga të cilët 2 ndodhen në terapi intensive.
