Një aksident i rëndë ndodhi ditën e sotme në Tiranë, ku një 30-vjeçare u përplas nga një makinë në zonën e Porcelanit. Detaje të reja bëhen të ditura nga ngjarja, ndërsa mësohet se 19-vjeçari që shkaktoi aksidentin është djali I ish-zv. drejtuesit të policisë së Shtetit, Erzen Breçani. Jehon Breçani ka qenë duke drejtuar një mjet tip “Benz” në momentin që ka shkaktuar aksidentin e rëndë rreth orës 19:15.
Për shkak të shpejtësisë automjeti ka dalë nga rruga dhe ka përplasur 30-vjeçaren e cila ishte duke qëndruar pranë një peme. Vajza e aksidentuar mësohet se ishte shtatzanë dhe ka pësuar dëmtime të rënda në gjymtyrët e poshtme. E reja ka qëndruar disa minuta në trotuar duke marrë ndihmën e parë nga kalimtarë të rastit, derisa erdhi ambulanca. Ajo u dërgua më pas në spitalin e Traumës për t’iu nënshtruar ndërhyrjes kirurgjikale, ndërsa raportohet se gjendja e saj është e rënduar.
Ndërkohë, policia njoftoi se i riu që shkaktoi aksidentin është shoqëruar në ambientet e Komisariatit nr.4 për veprime të mëtejshme hetimore. Ai iu nënshtrua testit të alkollit, por rezultoi se nuk ishte nën efektin e pijeve alkoolike. Dëshmitarët e rastit që ishin në vendngjarje në momentin që aksidenti ndodhi, thanë se e reja po qëndronte në trotuar.
