Studentët e universiteteve publike në vend kanë vendosur që ta çojnë deri në fund protestën për kauzën e tyre. Studentët, në ditën e 12-të të kësaj proteste, pavarësisht motit të keq do vijojnë të protestojnë në orën 11:30 para Kryeministrisë.
Sipas disa njoftimeve të studentëve në rrjetin social Facebook dhe Instagram, mësohet se grumbullimi i tyre do bëhet në orën 10:00 nëpër oborret e fakulteteve dhe në orën 11:00 do bëhet marshimi drejt Kryeministrisë.
Ata kanë paralajmëruar një protestë masive të hënën ku kanë bërë thirrje të gjithë qytetarëve që t’u bashkohen dhe të protestojnë bashkë me ta.
Kujtojmë se ditën e djeshme, u kërkua dorëheqja e Dhori Kules, nga studentët e fakultetit ekonomik, sepse sipas tyre nuk i ka pritur në takim për të diskutuar.
Studentët shprehen se do ta vazhdojnë protestën deri në plotësimin e 8 kërkesave të tyre pa dialog.
Kujtojmë se Presidenti Meta, rikthehu përsëri në Kuvend ligjin për buxhetin 2019 me qëllim që t’u jepet mundësia studentëve për plotësimin e kërkesave të tyre.
Sakaq, kryeministri Rama, vazhdon me deklaratat e tij nëpër media edhe në rrjetet e tij sociale, duke u bërë thirrje për dialog dhe duke bërë me dije studentëve që nëse nuk bashkëpunojnë për të diskutuar asgjë nuk do zgjidhet.