Policia e Tiranës ka vënë në pranga dy persona dhe ka proceduar penalisht një tjetër, pas një episodi dhune që çoi në plagosjen e një 39-vjeçari, i cili aktualisht ndodhet në spital nën kujdesin e mjekëve.
Sipas njoftimit të policisë, specialistët për Hetimin e Krimeve në Komisariatin Nr. 2 kanë arrestuar shtetasit B. P., 34 vjeç, dhe Xh. M., 32 vjeç, ndërsa ndaj 22-vjeçarit S. M. është iniciuar procedim penal.
Ngjarja u shkaktua nga një konflikt për motive të dobëta, gjatë të cilit të arrestuarit sulmuan fizikisht 39-vjeçarin. Gjatë incidentit, një 29-vjeçar, që u përpoq të ndërhynte për të ndalur dhunën, pësoi lëndime të lehta.
Materialet hetimore i janë referuar Prokurorisë për veprime të mëtejshme.
