Ngjarja e ndodhur pak ditë më parë në një kopsht privat në kryeqytet, ku u dhunua nga edukatorja një vajzë 3-vjeçare ka prekur mbarë opinionin publik. Në fakt për këtë ngjarje kanë reaguar shumë personazhe të njohur të botës së televizionit, të cilët janë edhe vetë prindër. Një nga këta personazhe është edhe Turjan Hysko, i cili përmes një InstaStory ka treguar se sa shumë është prekur nga kjo ngjarje e rëndë dhe aspak e këndshme.
Në fjalët e tij, Turi e vendos veten në vend të prindërve të vajzës 3-vjeçare, duke na dhënë një mesazh mjaft të ndjeshëm. Ai thotë se ka ardhur koha mos të përgjigjemi me dhunë, por të bëhemi më të mirë, për një shoqëri më të mirë.
“Qava sot! Pashë videon e vajzës 3-vjeçare. Atara për pak muaj mbush 3 vjeç. Vij vërdallë nëpër shtëpi e nuk di se çfarë duhet të bëj si baba, si burrë, si person publik, si qytetar. Nuk di! Më vjen të shkoj tek shtëpia e asaj familjes e t’i përqafoj fort. I ati bënte dy punë për të ardhmen e gocës. Një çift normal që sakrifikojnë dhe kanë menduar që kopshti privat është i sigurt, është i duhuri për fëmijën e tyre. Njerëz të mirë! Kam menduar se çfarë do i bëja unë asaj. Oooo sa gjëra kam menduar, por në fakt i dobët do isha unë! Prindërit e vajzës na dhanë një mësim të gjithëve si shoqëri. Dhuna prej vitesh po pjell dhunë. Ndoshta ka ardhur koha që t’i themi ‘stop’ për t’u bërë më të mirë, jo duke u përgjigjur me dhunë…”, shkruan i prekur Turjan Hysko.
