Ish-anëtari i One Direction, Liam Payne, ka ndërruar jetë tragjikisht në moshën 31-vjeçare.
Lajmi u konfirmua nga policia lokale se muzikanti britanik gjeti vdekjen pasi ra nga kati i tretë i ballkonit të dhomës së tij të hotelit në Buenos Aires të Argjentinës.
Pamjet nga dhoma e këngëtarit tregojnë një televizor të copëtur, substanca narkotike dhe shumë sende të tjera.
Momentalisht është e paqartë nëse Payne ra aksidentalisht, apo u hodh nga ballkoni i hotelit CasaSur Palermo.
Policia kishte marrë raportime nga hoteli për një person “që po sillej në mënyrë agresive dhe që mund të ishte nën efektin e drogës apo alkoolit”.
Ngjarja e rëndë ndodhi rreth orës 17:00, me orën lokale. 31-vjeçari gjeti vdekjen në vendin e ngjarjes.
Muzikanti ka qenë i hapur në media për betejën e tij me varësinë nga droga dhe për kohën që ka shpenzuar në një institucion rehabilitimi.
Një grup mjekësh ligjorë ndodhen në hotelin ku ndodhi ngjarja tragjike në Buenos Aires për të kryer të gjitha hetimet e nevojshme.
Ndërkohë, një grup i madh fansash janë mbledhur jashtë hotelit për të mbajtur zi për vdekjen e 31-vjeçarit – duke ndezur qirinj, duke kënduar këngë të One Direction dhe duke mbajtur momente heshtjeje.
