Makina që po transportonte Izet Haxhinë te Krimet e Rënda është aksidentuar.
Ngjarja ka ndodhur dy ditë më parë dhe është bërë publike nga avokati i Haxhisë, Idajet Beqiri.
Sipas këtij të fundit, përplasja ka qenë e qëllimshme dhe po tentohet eliminimi fizik i Haxhisë.
Më tej avokati shton, se kjo ngjarje vjen pikërisht pasi Haxhia për 4 ditë me radhë ka dhënë deklarimet e tij në lidhje me krimet e kryera nga ish-kryeministri Sali Berisha, për periudhën 1991-1999.
Beqiri tregon se si pasojë e aksidentit, Haxhia ka patur të vjella dhe është çuar me urgjencë në spital.
Ndër të tjera avokati bëri me dije, se Haxhia ka ndërprerë deklarimet kundër Berishës, derisa t’i sigurohet mbrojtje atij dhe familjes.
Reagimi i plotë i avokatit Idajet Beqiri:
Izet Haxhia ndërpret menjëherë deklarimet kundër Sali Berishës në Prokurorinë e Krimeve të Rënda. Jeta e tij dhe i njerëzve të afërt të tij rrezikohet në mënyrë dramatike. Tentohet eliminimi fizik i tij .
Izet Haxhiaj, pasi ka deponuar plotë 4 ditë me radhë për 25 orë të qendrimit në Prokurorinë e Krimeve të Rënda në Tiranë kundër krimeve të kryera nga Sali Berisha për periudhën 1991-1999, në datën 09.10.2019, kur është shoqëruar për të vazhduar deklarimit dhe për të paraqitur provat dhe faktet për çdo akuzë, makina që e shoqëronte ka bërë “aksident”, duke u përplasur. Izet Haxhiaj ka pësuar fraktura në kokë, ka patur të vjella dhe është çuar me urgjencë në Spital…
Për katër ditët që Izet Haxhia ka dhënë deklarimet e tij në Prokurorinë e Krimeve të Rënda, pas kallëzimit penal të bërë prej tij kundër Sali Berishës në muajin dhjetor 2018, bota e krimit është aktivizuar me një egërsi të paimagjinueshme, sidomos në rrjetet sociale, kundër Izet Haxhisë, njerëzve më të afërt të tij si dhe mbrojtësve ligjor të tij. Strukturat e shtetit, institucionet përkatëse ligjzbatuese, megjithëse i shohin këto reagime, shantazhime, kanosje serioze për vrasje etj, nuk i marrin në mbrojtje, për t’u siguruar jetën, së paku Izet Haxhisë, këtij dëshmitari okular që me prova dhe me fakte të pakontestueshme po denoncon krimet më të rënda që janë kryer prej ish presidentit të Republikës së Shqipërisë Sali Berisha në vitet 1991-1999, duke i sjell vendit dhe familjeve shqiptare plagë të rënda dhe tragjike.
Në kushtet e mësipërme mbrojtësi ligjor i ka rekomanduar Izet Haxhiaj ndërprerjen e menjëhershme të deklarimeve të tij para Prokurorisë së Krimeve të Rënda kundër Sali Berishës, derisa të marrim garancitë e plota nga institucionet ligjzbatuese të shtetit shqiptar për jetën e tij dhe të njerëzve të afërt të tij.
Izet Haxhia është dënuar për vrasjen e Azem Hajdarit.
Ai u ekstradua pak muaj më parë nga Turqia, ndërsa fitoi edhe të drejtën e rigjykimit.
