Detaje të reja bëhen me dije në lidhje me ngjarjen zbuluar sot në Kombinat, ku nënë e bijë, Zhaneta Josifi 56-vjeç dhe Anisa Josifi 30 vjeç u gjetën të pajeta, ndërsa vajza tjetër e familjes Blerta Josifi u dërgua në gjendje të rëndë në spital.
Kreu i policisë së Tiranës, Rebani Jaupaj u shpreh para mediave se ka qenë vëllai i 56-vjeçares dhe daja i dy vajzave që ka njoftuar policinë, pasi nuk kishte kontakt me motrën dhe dy mbesat.Po ashtu ai pohoi se tek vajzat ka pasur shenja të mos ushqyerjes.
“Është gjetur një 33-vjeçare dhe e ëma të cilat janë pa shenja jete. U krijua grupi hetimor me dy ekspertë mjeko-ligjorë, dy oficerë dhe po kryen veprime në vendngjarje. Paraprakisht eksperti mjeko- ligjor komunikoi, dhe dy viktimat nuk kanë shenja jete, por mendohet që mund të jenë vetëflijuar. Grupi hetimor po vazhdon hetimet. Jemi në hetime intensive, menjëherë do iu njoftojmë konkluzionet.
Ju thashë që mendohet për vetëflijim. Për këtë ne po grumbullojmë materialet, prova, në ambientet e banesës. Kemi gjetur shënime fetare. Do bëhet ekspertiza. Dy vajzat kanë qenë të arsimuara, kanë mbaruar shkollën e lartë por ishin të papuna. Ka shenja të mosushqyerjes tek vajzat në ditët e fundit”,- tha Rebani Jaupaj.
Gjithashtu policia tha se tre gratë, kishin disa javë që nuk dilnin nga banesa e tyre.
Familjaret dhe fqinjët kanë njoftuar dhe para 3 javësh policinë me pretendimin se kishin javë që nuk i shihnin gruan dhe 2 vajzat. Policia e zonës mori kontakt me familjen Josifi dhe ato i thanë që është zgjedhja e tyre personale për të mos dalë nga banesa.
Ndërsa një fqinje e viktimave ka deklaruar se e ëma dilte e bënte pazar, ndërsa vajzat nuk i kishte parë prej kohësh, që nga fillimi i karantinës. Fqinja u shpreh se e zonja e shtëpisë nuk e kishte të shoqin, pasi ai kishte ndërruar jetë disa vite më parë.
“Që në pandemi ishin mbyllur. E ëma dilte. Kisha ca kohë pa i parë. Kishte vetëm dy vajza.Nuk e mbaj mend kur i kam parë për herë të fundit. Jetojmë në një pallat po secili shikon hallin e vet. Të gjithë janë me probleme. Ka një motër në pallatin tjetër, vinin shpesh i shikonin”, u shpreh ajo.”
