Një ngjarje e rëndë është regjistruar në Ostren të Bulqizës, ku Xhelal Mziu, kandidat i PD në Qarkun e Dibrës, së bashku me nipin e tij, ka grushtuar punonjësin e njësisë administrative, Kalosh Murra.
Murra, i cili mban detyrën e përgjegjësit të ndihmës ekonomike, u sulmua pas mbledhjes së shtabit elektoral të PD në Gollobordë.
Dëshmitarët e ngjarjes pohuan se Murra ishte në derën e zyrave të njësisë administrative kur Mziu është shkëputur nga grupi dhe ka vrapuar drejt tij, duke e goditur me grusht.
Pas incidentit, policia dhe hetues të SPAK kanë mbërritur në vendin e ngjarjes për të hetuar më tej rreth rastit.
Njoftimi i Policisë:
Bulqizë/Specialistët për Hetimin e Krimeve të Komisariatit të Policisë Bulqizë referuan materialet në SPAK, për veprën penale “Kanosja apo dhunimi ndaj pjesëmarrësve në zgjedhje”, për shtetasit Xh. M., 58 vjeç dhe E. M., 36 vjeç, xhaxha e nip, të dy banues në Tiranë, sepse rreth orës 13:00 të datës 24.04.2025, pas një takimi elektoral të zhvilluar nga subjekti politik “Partia Demokratike”, në fshatin Ostren, dyshohet se kanë goditur me grushte, shtetasin K. M., 33 vjeç, banues në Shupenzë, në ambientet e jashtme të njësisë administrative Ostren.
