Shumë shtete dhe grupe shkencëtarësh po punojnë në presionin e kohës për të nxjerrë një vaksinë sa më të saktë dhe të pakontestueshme për të luftuar koronavirusin.
Ka edhe shtete të tjera si Rusia që kanë deklaruar prodhimin e vaksinës, por ende shumë kampione mbeten në fazat e para të testimit.
Por një dokument i Shërbimit Shëndetësor Kombëtar në Britaninë e Madhe, që ka “rrjedhur” aksidentalisht në media, thekson se, vaksina kundër koronavirusit pritet të dalë muajin që vjen.
Sipas “Daily Mail”, pesë qendra të mëdha vaksinimi pritet të ngrihen në mbarë vendin përpara Krishtlindjeve.
Dokumentet e rrjedhura në media, tregojnë se, qindra bluza të bardha do të dërgohen në këto pesë qendra të mëdha, për të injektuar dhjetëra-mijëra vaksina përditë.
“Ata që janë më vulnerabël ndaj virusit do të thirren të parët”,- mësohet të thuhet në këtë dokument, raporton “Daily Mail”.
Përveç pesë qendrave të mëdha të vaksinimit, pritet që të krijohen edhe njësi lëvizëse vaksinimi për të shkuar pranë komuniteteve vulnerabël.
Më herët, qeveria bëri të ditur se, pritet të angazhojë edhe ushtrinë për operacionin e madh të vaksinimit, por nuk ka saktësuar nëse ky proces do të bëhet me detyrim apo jo.
Ministri i Shëndetësisë, Matt Hancock, tha në parlament se, vaksina është shpresa e madhe.
Deri tani, vaksina e Universitetit të Oksfordit është pretendentja për të marrë dritën jeshile nga organet rregullatore.
/Burimi: Daily Mail/ Përshtati: GazetaReforma.com/
