Kukësi është zgjuar këtë mëngjes nën temperatura të acarta që kanë zbritur në -4°C. Reshjet e dëborës që ranë mbi lartësinë 600 metra kanë arritur deri në 20 cm, por nuk kanë shkaktuar pengesa në qarkullimin rrugor.
Megjithatë, temperaturat e ulëta të shoqëruara me dëborë dhe ngrica mendohet se kanë dëmtuar ndjeshëm kulturat frutore, të cilat ndodhen në fazën e lulëzimit ose mbylljes së ciklit. Specialistët thonë se dëmet janë më të mëdha tek pemët si kumbulla, qershia, pjeshka, kajsia dhe dardha.
Korçë:
Në këtë qark, reshjet e dëborës me intensitet mesatar kanë përfshirë të gjithë territorin, duke arritur trashësi prej 10 deri në 25 cm në zonat malore. Subjektet kontraktore kanë kriposur dhe mirëmbajtur akset kryesore, duke garantuar lëvizje normale. Bashkitë janë angazhuar për pastrimin e rrugëve dytësore dhe të shesheve në qytete. Disa zona, si Pogradeci, Maliqi dhe Proptishti, kanë pësuar ndërprerje të energjisë për shkak të erës, por ekipet e OSHEE janë në terren për riparime.
Shkodër:
Në qarkun e Shkodrës, situata më e rënduar paraqitet në rrugët e Iballës, në Pukë, për shkak të dëborës së dendur. Ndërkohë, rruga Bogë–Theth është e hapur. Në Malësinë e Madhe, Vau i Dejës, Fushë-Arrëz dhe bashkinë Shkodër, nuk raportohen probleme serioze. Në Fushë-Arrëz, dëbora ka arritur 30 cm, por rrugët nacionale janë të hapura për mjetet e pajisura me zinxhirë. Edhe në bashkinë Pukë, ku dëbora ka arritur 5 cm, rrugët janë të kalueshme.
Dibër:
Pas reshjeve të dëborës, në Dibër janë shfaqur ngrica të forta, të cilat mund të sjellin dëme në bujqësi e frutikulturë. Rrugët nacionale si Bulqizë–Peshkopi dhe Bulqizë–Tiranë janë të kalueshme, por ka vështirësi në rrugët e brendshme të Bulqizës. Në aksin Klos–Tiranë, një aksident për shkak të ngricës ka lënë të plagosur katër persona që ndodhen në spitalin e Traumës në Tiranë. Në Mat, situata është e qëndrueshme dhe nuk raportohen dëme të konsiderueshme.
Institucionet lokale dhe strukturat e emergjencave civile po monitorojnë vazhdimisht situatën për të garantuar ndërhyrje të shpejta ku është e nevojshme.
