Situata e rënduar nga COVID-19 në vendin tonë është reflektuar edhe në institucionet e dënimit. Bëhet me dije se virusi ka shkaktuar një situstë alarmante në burgun e sigurisë së lartë në Peqin. Media të ndryshme komunikojnë se dhjetra të dënuar “VIP” janë të infektuar. Mësohet se situata në burg është e rëndë, ndërkohë ka pasur edhe autoambulanca që kanë dalë nga ambientet e burgut për të transportuar të prekurit në drejtim të kryeqytetit.
Ndër personazhet më të njohur të botës së krimit që është infektuar me virus është edhe Dritan Dajti i cili u ekzaminua në QSUT, dhe po trajtohet tashmë në spitalin e burgut, ku ka shfaqur komplikacione serioze të sëmundjes.Drejtoria përkatëse e burgut të Peqinit nuk ka pasur ende një reagim zyrtar për situatën e krijuar.
Ndërkohë, gjendja në vendin tonë vazhdon të mbetet e rëndë me shifrat ditore që nuk kanë zbritur në më pak se një mijë të infektuar. Gjatë ditës së djeshme janë njoftuar 1105 raste të reja dhe 14 viktima. Po ashtu, ditën e djeshme kanë hyrë në fuqi edhe kufizimet e reja për të parandaluar përhapjen e virusit që do të zgjasin dy javë. Komiteti Teknik vendosi që ora policore të fillojë që në orën 20:00 deri në orën 06:00 dhe gjatë kësaj kohe baret dhe lokalet do të qëndrojnë të mbyllura.
