Covid-19, rregulla të reja për qytetarët që duan të shkojnë në Mal të Zi

Ministria për Evropën dhe Punët e Jashtme ka njoftuar se që nga data 2 janar, në Mal të Zi do të ketë masa të reja anti-covid për të gjithë qytetarët që duan të shkojnë në këtë shtet. Sipas njoftimit, qytetarëve që futen në Mal të zi, do u kërkohet një certifikatë vaksinimi me numrin e plotë të dozave.

Veç të tjerash, mësohet se lejohet kalimi në kufi vetëm nëse keni vërtetim që e keni kaluar Covid-19, jo më pak se 10 ditë dhe jo më shumë se 180 ditë nga testi pozitiv PCR.

Njoftimi:

Ministria për Evropën dhe Punët e Jashtme njofton masat e reja për hyrjet në Malin e Zi. Duke filluar nga data 02 janar 2022, lejohet të kalohet kufiri:

– Me certifikatë vaksinimi të plotë me numrin e duhur të dozave, dhe nga doza e dytë të mos ketë kaluar më shumë se 6 muaj.

– Me vërtetimin se personi ka kaluar kovidin (që ka kaluar jo më pak se 10 ditë dhe jo më shumë se 180 ditë nga testi pozitiv PCR ose i shpejtë antigen).

-Në të dyja rastet personi duhet të ketë patjetër ose testin negativ PCR jo më të vjetër se 72 orë, ose testin e shpejtë Antigen jo më të vjetër se 48 orë. Kjo do të thotë që nuk është më e mundur hyrja në Mal të Zi vetëm me test negativ.