Ndonëse më 1 qershor ka nisur plazhi për hoteleritë, duket se sezoni turistik këtë vit do shoqërohet me probleme të shumta, teksa agjencitë turistike kanë deklaruar se nuk janë gati për hapjen sepse ka ende shumë paqartësi.
Ministri i Turizmit Blendi Klosi ishte i ftuar mbrëmjen e sotme në ‘Opinion’, ku ka folur rreth turizmit dhe çeljes së sezonit turistik.
Gjatë emisionit ai u përfshi në një debat me drejtuesin e emisionit, pasi Fevziu e pyeti ministrin se përse nuk po investohet në turizmin detar dhe nuk ka porte jahtesh për ata që vijnë përmes rrugëve detare.
Sipas ministrit ky lloj turizmi në vendin tonë nuk është i zhvilluar, teksa lidhur me portin e jahteve në Orikum ai u shpreh se nuk ka kapacitete të mjaftueshme.
Mirëpo, Fevziu i ka vënë përballë Klosit disa foto nga ky port, duke u shprehur se ky ai është goxha i madh, por shfrytëzohet nga peshkarexhat dhe varkat, pasi siç duket autoritetet nuk kanë ndërhyrë.
Siç duket edhe nga fotot, pamjet lënë shumë për të dëshiruar, teksa Fevziu ia drejtoi gishtin Ministrisë së Turizmit për këtë problem duke thënë se ministria duhet të jetë e përgjegjëshme dhe jo ta kthejë në një vend ku shiten çokollata dhe fara luledielli.
Fevziu: Shihe portin e jahteve për të cilin më the është i vogël, ta shohin edhe qytetarët. Shihe peshkarexha…
Klosi: Po e di, e di kush t’i ka dërguar fotot. Dakord.
Fevziu: Po si mund të jetë port jahtesh ky?
Klosi: Në çfarë vendi të botës nuk ka varka.
Fevziu: Po çfarë porti jahtesh është ky, se më the se nuk ka kapacitete?
Klosi: Këto varka janë në gjithë botën. Orikumi nuk është një port i strukturuar, është investim që ka ngelur, sepse kanë ngelur politikat për portet e jahteve…
Fevziu: Nëse ky port funksionon si port jahtesh bravo, nëse nuk funksionon i hiqet licenca. Ministria për këtë punë është, jo ta kthejë në një vend ku shiten çokollata dhe fara luledielli.
Klosi: Aty ka parkuar një anije peshkimi që nuk duhet të jetë. Siç e shikoni mbrapa janë vetëm jahte.
