Ish-presidenti Bamir Topi, ka komentuar çështjen e detit midis Greqisë dhe Shqipërisë, e cila u dërgua në Gjykatën Ndërkombëtare të Hagës me dakordësi nga të dyja palët.
Topi e ka quajtur këtë lëvizje të Ramës, si vendim personal të tij. Sipas Topit, kryeministri e ka zgjedhur ta dërgojë këtë çështje në Institucionin e Gjykatës Ndërkombëtare, për shkak të paaftësisë së qeverisë shqiptare për të negociuar me palën greke.
“Personalisht nuk kam arsye ta konsideroj tradhëti, pasi nuk është e tillë. Në analizën time dorëzimi i çështjes së Detit në Gjykatën e Hagës, dëshmon së pari, një paaftësi e dështim të dukshëm në planin politik të qeverisë shqiptare, e cila thuajse nuk negocioi asnjëherë me qeverinë e z. Micotaqis dhe më shumë bëri reality shoë me përfaqësuesit e qeverisë së majtë të Ciprasit”, ka thënë ish-presidenti Topi.
Ish-presidenti në një intervistë për “Telegraf”, ka theksuar se ky vendim, jo vetëm nuk është në dakortësi me presidentin dhe kuvendin, por është në shkelje të Kushtetutës.
“Si rezultat kemi një vendim personal të Kryeministrit dhe jo të Kuvendit e Presidentit për ta çuar në Hagë. Kjo gjë jo vetëm përbën shkelje kushtetuese por e çon Shqiperinë pa një zë të unifikuar e cila lexohet nga jashtë Shipërisë si pikë e dobët”, ka deklaruar ish-presidenti./GazetaReforma.com/
