Ministri Fuqiplotë, Bledi Çuçi, ka bërë një bilanc, për përpjekjet e bëra deri më tani, për të kapërcyer pasojat e tërmetit të 26 nëntorit.
Si fillim ai ka falenderuar të gjithë bashkombasit, por edhe shqiptarët e Kosovës, të cilët kontribuan me strehë, veshje dhe ushqim, për të prekurit nga tërmeti.
Gjithashtu Çuçi ka falenderuar edhe partnerët e Shqipërisë, disa vende të BE-së, SHBA-të dhe Izraelin.
Ministri bëri me dije se deri më tani janë strehuar 13.294 qytetarë.
Për ata që humbën të afërmit nga tërmeti, janë dhuruan në Durrës dhe Tiranë 23 apartamente.
Përsa i përket dëmeve, janë inspektuar 14.069 objekte, në mesin e të cilëve janë 261 pallate të dëmtuara rëndë, si dhe 2237 shtëpi.
Deri më sot sipas ministrit, Bashkia e Tiranës ka miratuar bonusin e qirave për 922 familje, ndërsa në Durrës bonusi është miratuar për 666 familje.
Ndërkohë shuma e fondeve të dhuruara nga BE dhe shtetet e tjera është 23 milion euro, ndërsa nga portali qeveritar janë mbledhur 58 milion lekë.
Fondi i parë i miratuar për përballimin e emergjencës pak ditë më parë ishte 20 miliardë lekë.
