Këtë të shtunë po zhvillohet dita e dytë e trajnimit për Forumin Rinor të Partisë Demokratike të Shqipërisë, me ekspertë të fushatave zgjedhore nga SHBA dhe Britania e Madhe.
Në trajnim, kryetari i PD-së, Sali Berisha, mbajti një fjalim ku dha një mesazh për të rinjtë demokratë. Ai theksoi se një lider nuk duhet të ketë frikë, duke e cilësuar frikën si pushtuesin më të madh.
Ish-kryeministri shtoi se një lider mund ta realizojë vizionin e tij vetëm me krijimin e një ekipi. “Një lider nuk duhet të ketë frikë. Nuk ka pushtues më të keq për njeriun se sa frika. Kurrë nuk duhet ta harroni këtë. Duhet të tregojë forcë dhe determinizëm, në asnjë mënyrë arrogancë”, tha Berisha.
Ai theksoi rëndësinë e bashkëpunimit për realizimin e vizioneve dhe projekteve dhe përmendi “sekretin” e suksesit: ekipi. “Një lider mund të realizojë vizionin e tij vetëm me krijimin e një ekipi. Kur shkojmë tek ekipi, kurrë mos përfillni, mos u merrni me dobësitë e anëtarëve të tij. Merruni vetëm me talentet, aftësitë dhe dhuntitë e anëtarëve të tij”, theksoi ai.
Berisha theksoi se kur fokusohet te cilësitë më të mira të anëtarëve të ekipit, mund të arrihen gjëra të jashtëzakonshme, duke bërë mrekulli që duken të pamundshme në shikim të parë. Ai përfundoi duke nënvizuar se është e domosdoshme që një lider të ketë ekip dhe të funksionojë me të në këtë mënyrë.
