Më 17 mars Bashkimi Europian vendosi të mbyllë kufijtë për të gjitha shtetet joanëtare, me qëlllim parandalimin e përhapjes së pandemisë.
Mirëpo, tashmë kanë kaluar rreth 2 muaj nga ky vendim dhe sezoni turisik është afër, çka do të thotë se mbajtja mbyllur e kufijve do ndikojë negativisht në ekonominë e shumë vendeve, pasi turizmi është një nga shtyllat kryesore ekonomike në shumë prej tyre.
Në këtë mënyrë, duket se BE po planifikon një hapje graduale të kufijve, si një përpjekje për të rifilluar aktivitetin e industries së turizmit, si një prej industrive të goditur rëndë nga pandemia e koronavirusit.
“Mesazhi ynë për qytetarët është se ne do të kemi një sezon turistik këtë verë,” tha komisioneri për çështje ekonomike Paolo Gentiloni, duke shtuar se “kjo do bëhet nën masat e rrepta të sigurisë dhe kufizimeve.”
BBC, raporton se nga e premtja do të ketë kontrolle të shumta në pikat kufitare dhe më pas më 15 qershor duhet të rifillojë lëvizja e lirë.
“Ne duam ta bëjmë jetën e përditshme të njerëzve më të lehtë dhe të hedhim një hap drejt normalitetit,” tha kancelari Sebastian Kurz.
Gentiloni tha se industria e turizmit në Europë po përballet me një humbje prej 40% të aktivitetit të saj.
Cili është plani i BE-së?
Komisioni Europian tha se udhëzimi i tij ishte i bazuar në parimet e sigurisë dhe duke qenë se turizmi jep pothuajse 10% të prodhimit ekonomik të Europës dhe miliona vende pune në të 27 vendet anëtare, atëherë ai shihet si një shtyllë e rëndësishme dhe problem që duhet zgjidhur.
Nënkryetarja e KE Margrethe Vestager tha se askush nuk duhet të udhëtojë nëse ka simptoma, teksa vendet po punojnë së bashku për të hequr gradualisht masat kufizuese e për të hapur me pas kufijtë, duke vendosur protokollet që duhet zbatuar për të evituar virusin.
Kjo hapje mund të fillojë duke lejuar fillimisht punëtorët sezonalë të lëvizin jashtë kufijve, e ndjekur nga hapja e kufijve midis vendeve që kanë situatën nën kontroll dhe më pas hapjen e të gjitha kufijve të brendshëm të BE-së.
Rimbursime apo kuponë për udhëtime e anuluara?
Një nga pyetjet e mëdha për europianët është se çfarë do të ndodhë nëse udhëtimet e tyre anulohen.
Zv.presidentja e KE, Vestager pranoi që, teksa kompanitë e udhëtimit përballen me një krizë të thellë, “edhe konsumatorët evropianë kanë të drejtën e një rimbursimi të parave që kanë paguar”.
Ajo tha se kriza do të ishte më pak e rëndë nëse konsumatorët do të pranonin të marrin kuponë, kështu që më tepër po punohen në këtë opsion.
“Sigurisht që kjo nuk do të jetë një verë normale por kur të gjithë punojmë së bashku … atëherë nuk kemi pse të përballemi me një verë të humbur plotësisht,” u tha ajo gazetarëve.
Sa i përket vendit tonë, kryeministri tha dje se është jashtëzakonisht e vështirë për të menduar se çfarë do të ndodhë këtë verë me këtë sektor.
Sipas tij, të gjitha vendet e botës po ecin në mënyrë somnabul, me duart përpara dhe sytë mbyllur, kur iu duhet të mendojnë për turizmin, që e cilësoi si një thikë shumë e mprehtë me dy presa, pasi është një rrezik shumë i madh.
Kështu,deri tani qeveria nuk ka ende një plan konkret.
LEXO: Brenda muajit hapen të gjithë kufijtë tokësorë. Ja ç’do ndodhë me fluturimet dhe turizmin këtë verë?
