Kryebashkiaku i Shkodrës, Benet Beci, ka inspektuar punimet e rikonstruksionit në shkollën “Ndre Mjeda”, vetëm pak ditë para nisjes së vitit të ri shkollor. Në një postim në Facebook, ai ndau pamje nga kantieri duke theksuar se shkolla është drejt përfundimit dhe gati të presë nxënësit.
Megjithatë, një detaj në fotot e publikuara ka shkaktuar reagime të shumta. Në pamje shihet se tualetet e shkollës janë ndërtuar pa ndarje dhe pa dyer, me disa WC të vendosura në rresht përgjatë murit, pa asnjë privatësi për nxënësit.
Ky element është vënë në dukje menjëherë nga komentuesit, të cilët kanë kritikuar ashpër kryebashkiakun për kushtet e banjove. Shumë prej tyre shprehen se një organizim i tillë i shërben më shumë turpërimit dhe bullizimit mes nxënësve sesa funksionalitetit.
“Shikoni banjon njëherë, zoteri, se ashtu është tmerr pa dyer. Nuk është dhomë zhveshjeje ta bëni me ndarje si në palestër, por banjo vend personal. Pa dyer nuk lihet sidomos me këtë brez që për çdo gjë bullizojnë njëri-tjetrin”, shkruan një komentues.
Një tjetër shton: “O zoteri, si shkojnë fëmijët në banjo kështu pa dyer, me e pa njeri-tjetrin si e bajn? As për djemt, as për vajzat nuk është e pranueshme. Fëmijët do detyrohen të kryejnë nevojat në klasa.”
Të tjerë theksojnë rrezikun për shtimin e rasteve të bullizmit: “Besoj se banjot duhen ndarë sepse ndodhin bullizime shumë, dhe shkolla duhet t’i parandalojë, jo t’i shtojë ato.”
Diskutimet po ngrihen mbi kushtet e papërshtatshme dhe mungesën e standardeve bazë të privatësisë në institucionet arsimore.
