Balla ka theksuar se një pjesë e opozitës ka penguar funksionimin e duhur të seancës duke ngritur çështje që nuk lidhen me raportet e institucioneve. Ai kritikoi opozitën për fokusimin në arrestin shtëpiak të Sali Berishës dhe për kërkesat për shpjegime nga prokurori për kallëzime të bëra, duke e quajtur këtë një konflikt të pastër interesi. “Minimalisht bie ndesh me Kodin Etik, nuk mund të përdorësh Kuvendin, sepse je palë në proces dhe ke konflikt interesi,” shtoi Balla.
Ministri i Brendshëm lavdëroi institucionet e reja të drejtësisë për arritjet e tyre, duke theksuar se gjithmonë ka vend për përmirësime. “E vërteta është që këto institucione kanë rezultate. Gjithmonë ka vend për t’u përmirësuar,” tha ai, duke shprehur dëshirën që opozita të njohë dhe të vlerësojë këto arritje.
Balla gjithashtu shprehu shqetësimin për mungesën e vendimeve ekzemplare në çështjet e dhunës në familje dhe zjarrvënies, duke kërkuar nga Këshilli i Lartë Gjyqësor një fokus më të madh në këto çështje. “Numrat tregojnë se edhe pse kemi numër të madh referimesh, përsëri na mungojnë vendimet ekzemplare,” theksoi ai.
Në përfundim, Balla bëri thirrje për ndarjen e qartë të pushteteve dhe respektimin e parimit të kontrollit dhe balancës, duke shprehur shqetësimin për përdorimin e Kuvendit për interesa të ngushta politike.
