Detaje të reja kanë dalë në dritë në lidhje me atentatin ndaj Prokurorit Arjan Ndoja, pasditen e djeshme në mbikalimin e Shkozetit.
Dyshohet se autorët e atentatit janë vrasës me pagesë, nga Kosova ose veriu i vendit, shkruan ‘Dosja.al’.
Mendohet se autorët kanë përdorur dy makina, ku njëra i ka prerë rrugën fillimisht.
Kanë qenë manovrat e shoferit të Ndojës, që i kanë shpëtuar jetën atij dhe Landi Muharremit.
Autorët kanë qenë të maskuar dhe pas breshërisë së plumbave, janë larguar nga rruga e Ishmit.
Ata kanë shmangur edhe kamerat e sigurisë, pasi kanë përdorur rrugën Vorë-Fushë-Krujë.
Prokuroria dhe policia kanë në dorë si provë, makinën tip ‘Benz’, e cila u braktis nga autorët dhe për çudi nuk u dogj.
Brenda mjetit u gjetën dy maska dhe dy kallashnikovë.
Kjo dosje i ka kaluar prokurorit të Krimeve të Rënda, Anton Martini, i cili ditën e djeshme mori në pyetje prokurorin Ndoja.
Ky i fundit mohoi të ketë qenë shënjestra e atentatit.
Mësohet se në lidhje me këtë ngjarje janë shoqëruar dhjetëra persona, ndërmjet të cilëve edhe Julian Meçe, i cili ka qenë pjesë e bandës së Durrësit dhe i shpëtoi një atentati pak muaj më parë.
