Atentati në Durrës, Ndoja flet për dosjet e gjetura në makinë

Google+ Pinterest LinkedIn Tumblr +

Prokurori i Durrësit, Arjan Ndoja, të cilit iu bë atentat 6 ditë më parë, ndodhet ende në spital në kujdesin e bluzave të bardha.

Ai ka hematoma në syrin e djathtë, ndërsa është i fashuar në pjesën e sipërme të trupit.

Jashtë derës së dhomës qëndrojnë dy punonjës të policisë së Durrësit dhe nuk lejojnë asnjë njeri të futet më parë, pa aprovimin e tij.

Ndoja nuk është prononcuar për akuzat ndaj tij, ndërsa shpreh edhe zhgënjimin nga situata e krijuar pas ngjarjes.

Në një komunikim me gazetën “Panorama”, ai ka mohuar akuzat për dosjet e gjetura në makinë.

Ai shprehet se makina ndaj së cilës u qëllua është e bashkëshortes së tij.

Ndoja ka thënë se do të flasë për të gjitha në një moment të dytë.

Në lidhje me dosjet e gjetura në makinën me të cilën po udhëtonte, prokuroria tha, se nëse do të ishin të ndonjë rëndësie të veçantë, do të ishte tashmë në pranga.

Përsa i përket atentatit, Ndoja nuk e mohon që ka qenë ai objektivi, ndërsa nuk e ndan personin fizik nga prokurori.

“Sa i përket atentatit, nuk mendoj se ka të bëjë me mua si Arian, ndoshta si prokuror po… Unë nuk mund të flas për këto detajet tani, ndaj do të flas në një moment të dytë për të sqaruar gjithçka rreth akuzave ndaj meje. Nëse materialet e gjetura në makinën time do të ishin të një rëndësie të veçantë, që me implikonin mua, sot unë nuk do të isha këtu, pasi do më kishin arrestuar”, tha shkurtimisht Ndoja.

Në spitalin e Durrësit ndodhet edhe Aleksandër Laho, i cili ndodhej me të në makinë, në momentin e atentatit.

Ndërkohë shofer Andi Maloku, ndodhet në spitalin e Traumës në Tiranë.

Deri më tani, policia ka arrestuar Redjan Rrajën, si person të dyshuar për atentatin, ndërsa po punon për identifikimin e bashkëpunëtorëve.

Shpërndaje
Share.

Komento