Bisedat e zbuluara në platformën e kriptuar “Sky ECC” kanë nxjerrë në pah detaje të rëndësishme lidhur me atentatin e 26 shkurtit 2021 në “Stacionin e Larisës” në Athinë, ku u plagos 32-vjeçari Ari Papa, një banor i fshatit Dhivër në Sarandë.
Siç u bë e ditur nga gazetari Artur Bibe, Aleksandër Sadikaj, një emër i njohur për lidhjet e tij me grupe kriminale, ka qenë organizatori i këtij atentati.
Sipas bisedave të zbuluara, konflikti mes Sadikajt dhe Papës kishte origjinën tek një ngjarje tjetër, që ndodhi më 14 dhjetor 2020, ku u plagos kushëriri i Sadikajt, 16-vjeçari Rubin Kalemi.
Kalemi, së bashku me shtetasin Viljan Boraj, po udhëtonin me një makinë kur u qëlluan me armë zjarri nga një person i paidentifikuar, duke lënë Kalemin të plagosur rëndë. Ky incident u bë shkak për Sadikajn që të organizonte atentatin ndaj Ari Papës.
Më pas, Sadikaj rekrutoi disa persona, duke përfshirë një snajper, për të realizuar vrasjen e Papës. Atentati u realizua më 26 shkurt 2021 në “Stacionin e Larisës” në Athinë, ku Papa u plagos rëndë, por nuk humbi jetën.
Megjithatë, tre muaj pas këtij atentati, Papa u vra në një tjetër ngjarje të lidhur në një zonë tjetër të Athinës.
Ndërkohë, ngjarja e 14 dhjetorit 2020, që përbën shkak për këtë seri vrasjesh, ka ndodhur rreth orës 20:00 në kryqëzimin e rrugëve “Nikopoleos” dhe “Korthiou” në zonën e Kato Patisias në Athinë.
Policia u njoftua nga qytetarët për të shtëna me armë zjarri në këtë zonë, dhe kur mbërritën në vendngjarje, gjetën automjetin tip “Smart” me targa greke IYP 2521, ku ndodheshin dy meshkuj shqiptarë dhe një femër gjeorgjiane.
Njëri nga meshkujt ishte i plagosur me armë zjarri në shpinë dhe u transportua me urgjencë në spitalin “Gennimatas” në Athinë.
Në hetim, policia zbuloi se personat që ndodheshin në automjet nuk kishin ndërmend t’i njoftonin autoritetet, çka nxiti dyshime për rrethana të dyshimta lidhur me ngjarjen.
Hetuesit e policisë janë të angazhuar për të zbardhur plotësisht ngjarjet e lidhura dhe për të identifikuar dhe ndaluar të gjithë personat e përfshirë në këtë seri vrasjesh dhe atentatesh.
