Ditën e sotme policia e Tiranës ka arrestuar një 64-vjeçare e cila kishte mashtruar disa biznesmenë të fuqishëm në Tiranë.
Ajo shtirej sikur ishte përfaqësuese e një organizate të huaj dhe u premtonte atyre financime në projekte të mëdha ndërtimi.
Pas disa kallëzimeve nga pronarë e biznesmenë për shtetasen V. P., 64 vjeçe, banuese në Tiranë, është bërë edhe ndalimi e shoqërimi i saj në polici.
Mësohet se ajo kishte përvetësuar nga individë të ndryshëm, shuma të mëdha parash nëpërmjet mashtrimit.
Njoftimi policisë
Seksioni për Krimin Ekonomik dhe Financiar, pas marrjes së kallëzimit nga pronarë të disa bizneseve, se një shtetase, nëpërmjet mashtrimit, kishte përvetësuar fondet e tyre për përfitime personale duke u prezantuar si përfaqësuese e një organizate të huaj, bënë kapjen dhe ndalimin e V. P., 64 vjeçe, banuese në Tiranë.
Kjo shtetase prezantohej si përfaqësuese e një organizate të huaj dhe duke përdorur emrin e organizatës, mashtronte duke përvetësuar shuma të konsiderueshme parash nga biznesmenë të ndryshëm, të cilëve u premtonte financime në projekte të mëdha ndërtimi.
Materialet procedurale në ngarkim të kësaj shtetaseje, do t’i kalojnë Prokurorisë pranë Gjykatës së Shkallës Parë Tiranë, për veprat penale “Mashtrimi”, “Fshehja e të ardhurave” dhe “Mospagimi i taksave dhe tatimeve”.
