Gjatë një vizite në rezidencën Studentore Universitare nr. 2. Kryeministri i vendit Edi Rama ka diskutuar edhe në lidhje me situatën e strehimit të afganëve në konvikte.
Ai është shprehur duke thënë se procedurat e ngadalësuara për strehimin e afganëve që do të arrijnë në Shqipëri për të paktën një vit, mund të bëjë që të mos vendosen fare në konviktet e Qytet Studentit në Tiranë. Një opsion i sugjeruar nga Rama ishte akomodimi i tyre i menjëhershëm në strukturat hoteliere në zonat bregdetare.
“Këtu është pjesa ku përkohësisht do vendosen afganët. Megjithëse po shtyhet ardhja e tyre për shkak të shtyrjes së fluturimeve. Mund të ndodhë që mund të mos nevojiten nëse lirohen strukturat hoteliere pas përfundimit të sezonit. Nuk bëhet fjalë që të ikin studentët për të sjellë afganët këtu. Dhe e dyta që është me rëndësi është që mund të vijë momenti që vaksinimi të jetë me detyrim”, u shpreh Rama.
Megjithatë verën e ardhshme afganët pritet të transferohen sërish nga strukturat hoteliere në godinat e konvikteve, pasi koha e qëndrimit të tyre në Shqipëri do të jetë të paktën 1 vit, kjo në bazë të vendimit të marrë ditën e djeshme në këshillin e ministrave, ku u ngrit edhe Task-Forca për koordinimin e këtij procesi me në krye ministren e Jashtme Olta Xhaçka.
