Pas tërmetit shkatërrimtar të 26 nëntorit, në Shqipëri janë regjistruar shumë pasgoditje, por me magnitudë të ulët.
Në zonat e prekura, përveç dëmeve materiale të shumta, tërmeti ka krijuar edhe një situatë paniku.
Inxhinierja e njohur Luljeta Bozo, duke folur për emisionin “Tempora”, tha se më e madhja ka kaluar dhe pasgoditje do të ketë, derisa të çlirohet energjia nga brendësia e tokës.
Ajo ka këshilluar njerëzit që të mos shohin më aplikacionin për tërmetet.
Bozo shpreson që tërmeti të ndryshojë mënyrën sesi ndërtohet në Shqipëri.
“Kam një apel njerëzit ta mbledhin mendjen të mos i zërë paniku sepse sipas të gjithave gjasave e madhja kaloi pasgoditje do ketë derisa të çlirohet energjia nga brendësia e tokës. Ta marrim me qetësi. Mos shikoni shumë aplikacionin që është vënë. Sapo shikoni 3.1 ose 2.7 thoni obobo. Çfarë është 3.1 asgjë. Nuk është gjë fare 3.1 apo 3.5 ne ndërtuesit se quajmë gjë fare. Nuk e ndjejnë fare që kanë rënë. Nuk e dinë njerëzit, shikojnë magnitudën sikur çfarë është. Kam një merak të madhe që ne që i kemi shprehur mendimet tona shpresojmë që diçka të ndryshojë, ose të ndryshojë shumë në mënyrën sesi ndërtohet në Shqipëri duke nisur që nga të gjitha hallkat që duhet të respektohen që nuk janë respektuar. Kjo është pasojë e kësaj pune. Duhet që specialistët më të mirë të bëjnë një draft t’ia çojnë qeverisë. Por duhet riorganizim tjetër sepse nuk funksionon kështu.”, u shpreh ajo.
Si pasojë e tërmetit humbën jetën 51 persona, ndërsa 47 të tjerë u shpëtuan.
Në qytetet e prekura ka nisur puna për bilancin e dëmeve, ndërkohë vijon mbledhja e fondeve.
