Ditën e djeshme u përhap më shpejtësi lajmi se Albin Kurti u kërcënua nga ish-kandidati për deputet i Nismës Socialdemokrate, Haxhi Hoti.
Ai shkruante se Kurti duhet të largohet nga Kosova, përndryshe do vritet.
Mirëpo, më pas Hoti kërkoi falje publike, duke e cilësuar statusin e tij si një gabim teknik.
Lidhur me këtë ngjarje ka reaguar edhe vetë Kurti.
Me anë të një reagimi në Facebook ai kërkon që Hoti të lihet i lirë e ta presë në shtëpi Vitin e Ri.
“Unë nuk jam John Fitzgerald Kennedy kurse z. Haxhi Hoti nuk është Lee Harvey Oswald. Nuk mund t’i vlerësoj çështjet e sigurisë dhe as të përzihem në ato të drejtësisë, por besoj që do të ishte mirë që z. Hoti të lirohet e ta presë Vitin e Ri 2020 me familjen e tij në shtëpinë e tij”, shkruan Kurti.
Haxhi Hoti u shoqërua ditën e sotme në polici.
Nuk dihet ende vendimi që do merret për të.
