Kosovë– 160 foshnje kanë vdekur në Qendrën Klinike Universitare të Kosovës (QKUK), gjatë vitit 2019.
Ndërkohë numri total i lindjeve ka qenë 9,528.
Këto shifra janë dhënë nga drejtori i kësaj klinik, Xhevdet Gojnovci për Radion Evropa e Lirë.
Statistikat për lindshmërinë dhe vdekshmërinë e foshnjave, nuk përfshijnë të dhënat nga spitalet komunale dhe ato nga spitalet apo klinikat private.
Xhevdet Gojnovci thotë se ka pasur foshnje nga e gjithë Kosova me probleme shëndetësore që janë trajtuar në Klinikën e Neonatologjisë së QKUK-së.
“Ne i trajtojmë gjitha foshnjat nga e gjithë Kosova me probleme shëndetësore. Njëqindetridhjetë foshnje kanë lindur këtu, derisa 30 foshnje kanë ardhur nga spitalet regjionale apo nga shtëpia, e të cilat kanë ndërruar jetë. Këto foshnje kryesisht kanë qenë nën peshën 1,600 gramë. Viteve të fundit kemi një furnizim më të mirë me aparaturë, pasi që jeta e disa foshnjave varet nga aparatura në klinikën tonë. Andaj falë këtij furnizimi dhe rritjes së cilësisë së shërbimeve, kemi një numër më të vogël të vdekjeve të foshnjave”, thotë Gojnovci.
Gjatë vitit të kaluar, po në këtë klinikë kanë vdekur 203 foshnje, derisa kanë lindur 1,040 foshnje, çka sipas mjekëve, tregon se gjatë këtij viti ka pasur rënie të natalitetit në Kosovë.
