Gjykata e Sarandës ka vendosur “Arrest me burg” për 72-vjeçarin Bajram Tusha, i cili akuzohet se ka abuzuar seksualisht me një 13-vjeçare.
I moshuari u arrestua më 21 prill, pasi vajza bëri denoncimin në polici.
Vetë i moshuari ka pranuar veprën penale, duke thënë se vajza, e cila tashmë është 17 vjeçe, e ka provokuar disa herë duke u zhveshur para tij.
Gjithashtu hetuesit i kanë vendosur në përgjim ambiental të moshuarin me vajzën, dhe nga bisedat dëgjohet se i akuzuari i thotë 17-vjeçares që të ndryshojë dëshminë.
Në moshën 13 vjeçare, vajza me prindërit jetonin me qira në shtëpinë e të moshuarit, i cili ka 20 vite i ve, ndërsa fëmijët e tij jetojnë në Greqi.
Adoleshentja tregon se prindërit e dërgonin që t’i bënte ndonjë punë, pasi u vinte keq.
“Kur ne ndërtuam shtëpinë tonë u larguam dhe jetojmë në të njëjtën lagje, prindërve u vinte keq dhe më dërgonin shpesh t’i bëja ndonjë punë e t’i laja ndonjë pjatë, por ai abuzoi me mua dhe unë nuk i tregoja dot askujt se më vinte turp,” ka kallëzuar e mitura.
Vajza ka përmendur edhe 3 emra të tjerë, të cilët sipas saj kanë abuzuar me të.
Të tre komshinjtë e saj u morën në pyetje, por mohuan kategorikisht akuzat.
Ata i thanë policisë së vajza mund të ketë çrregullime psiqike për shkak të moshës.
Ndaj tyre nuk është marrë asnjë masë arresti pasi nuk ka prova të implikimit në histori.
Policia ka analizuar aparatet telefonike, por nuk ka gjetur asnjë mesazh apo formë tjetër komunikimi mes tyre.
Ndërkohë nëna e 17-vjeçares habiti jo pak opinionin publik, duke mohuar akuzat ndaj të moshuarit dhe duke thënë se historia është stisur nga i dashuri i vajzës.
