Agron Tufa ka shënjestruar një tjetër zyrtar të lartë.
Këtë herë shkrimtari ka akuzuar Xhavit Shalën, drejtor i Kërkimeve Shkencore në Akademinë e Sigurisë, se ka qenë pjesë e Sigurimit të Shtetit në kohën e komunizmit.
Nëpërmjet një statusi në Facebook, Tufa i drejton Shalës disa pyetje, për të cilat i kërkon të bëjë kujdes me përgjigjet.
Më tej ish-drejtori i Institutit për Studimin e Krimeve dhe Pasojave të Komunizmit zotohet se do t’i zbardh pikë për pikë të vërtetat e tmerrshme.
Reagimi i plotë
Postcriptum 1: nga “Punët dhe ditët” e ish oficerit të Sigurimit, shokut Xhavit Shala, sot Drejtor i lartë i Policisë së Shtetit dhe disa pyetje të karakterit mistik për shokun Xhavit:
1. Kë/cilët do të përgjonte punëtori i zellshëm operativ, shoku Xhavit, në zyrën e “pallatit përballë”?
2. “Zyra siguron kushte normale për ruajtjen e sekretit”. – Çfarë sekreti duhej të ruhej vallë?
3. Kush/cili nga punëtorët operativë e spiunonte tjetrin – Niko Subashi Xhavit Shalën apo Xhaviti Nikon? Ndoshta të dy ndësjelltësisht? Ndoshta asnjëri?
4. A i përdor ende punëtori i partishëm operativ i Sigurimit ish bp-të e tij nga Elbasani, për të shkruar e përhapur skenarë nëpër shtypin shqiptar kundër armiqve të Sigurimit dhe Rilindjes? Cilët janë pseudonimet e tyre? Shënim: Kujdes me përgjigjet! Partia të kap në flagrancë me zemër të pasinqertë! Dhe t’i zbraz pikë-pikë të vërtetat e tmerrshme. Të pashterrshme!
Kujtojmë se Agron Tufa ndodhet në Zvicër prej disa muajsh.
Ai, së bashku me familjen, ka kërkuar azil politik pasi ka marrë kërcënime dhe nuk ka gjetur mbrojtje nga shteti shqiptar.
